អារ៉ាប៊ីសាអូឌីត៖ កីឡាករព័រទុយហ្គាល់ Cristiano Ronaldo នឹងអាចបង្ហាញខ្លួនប្រកួតដំបូងបង្អស់របស់ខ្លួនជាមួយក្លិប Al Nassr នាថ្ងៃទី២២ ខែមករា ខាងមុខនេះ ក្រោយពីក្លិបបានចុះឈ្មោះកីឡាករ​ Ronaldo ក្នុងបញ្ជីកីឡាករបានដោយជោគជ័យរួចរាល់។ នេះបើតាមការបញ្ជាក់់របស់ក្លិប Al Nassr មកកាន់ក្រុមអ្នកសារព័ត៌មាន។

Ronaldo ដែលបានបង្ហាញខ្លួនជាផ្លូវការនៅមុខអ្នកគាំទ្រនាដើមឆ្នាំ២០២៣នេះ បានបញ្ចូលឈ្មោះក្នុងបញ្ជីផ្លូវការរបស់ក្លិប​ ក្រោយ Al Nassr បានសម្រេចបញ្ចប់កុងត្រាដែលនៅសេសសល់ជាមួយកីឡាករ Vincent Aboubakar ដើម្បីកំណត់ចំនួនកីឡាករបរទេសត្រឹម ៨នាក់ក្នុងក្លិបនីមួយៗ តាមច្បាប់របស់លីគនៃប្រទេសអារ៉ាប៊ីសាអូឌីត។

ប្រភពពីក្លិប Al Nassr បានបញ្ជាក់ថា ក្លិបបានសម្រេចបញ្ចប់កុងត្រាជាមួយកីឡាករ Vincent Aboubakar ដោយការព្រមព្រៀងពីភាគីទាំងសងខាង ខណៈ Aboubakar ក៏បានទទួលបាននូវថវិកា និងសំណងផ្សេងៗតាមច្បាប់ និងការព្រមព្រៀងផងដែរ ដោយក្លិបបានសម្រេចចុះបញ្ជីកីឡាករ Ronaldo តាំងពីមុនការប្រកួតជាមួយក្លិប Al Ta'ee មកម្ល៉េះ។ ប្រភពដដែលបានបញ្ជាក់ថា Ronaldo ក៏នៅតែទទួលរងបំរាមពីរប្រកួត ក្រោយហេតុការណ៍បោកទូរសព្ទរបស់អ្នកគាំទ្រកន្លងមក ដែលមានន័យថាគេនឹងត្រូវអវត្តមានក្នុងប្រកួតទល់នឹង Al Ta'ee ក៏ដូចជាមួយប្រកួតទៀតទល់នឹងក្លិប Al Shabab នាថ្ងៃទី១៤ ខែមករាខាងមុខនេះ។ 

ចុងក្រោយបង្អស់ វត្តមានរបស់ Ronaldo នឹងអាចលេងឱ្យក្លិប Al Nassr បានអំឡុងការប្រកួតទល់នឹងក្លិប Ettifaq នាកីឡដ្ឋាន MRSOOL Park នាថ្ងៃទី២២ ខែមករាខាងមុខ។ 

ចំពោះកីឡាករដែលបានចាកចេញ Vincent Aboubakar កំពុងមានពាក្យចចាមរ៉ាមពីការទៅចូលរួមជាមួយក្លិប Manchester United ខណៈក្លិប Al Nassr ផ្ទាល់បានត្រឹមបញ្ជាក់ថា កីឡាករជម្រើសជាតិកាមេរ៉ូន វ័យ៣០ឆ្នាំរូបនេះ បច្ចុប្បន្នជាកីឡាករដែលពុំមានក្លិបប្រកបអាជីពឡើយ (Free Agent) ដែលគេនឹងអាចចូលរួមជាមួយក្លិបណាក៏៏បានតាមការចរចា និងព្រមព្រៀងរវាងភាគីក្លិប និងសាមីកីឡាករ៕